كود – وكالات //

عدمّات طهران لاعب كاراتيه شاب عندو 21 عام، سميتو ساسان آزادوار، فالساعات اللّولة ديال صباح الخميس، من بعد ما تشدّ وسط الاحتجاجات. هاد الشي جا فوسط تحذيرات من الأمم المتحدة ومنظمات حقوق الإنسان اللي قالو بلي الإعدامات فإيران ولات كتطلع بزاف من بداية الحرب الأخيرة.

السلطة القضائية فإيران أكّدات حتى إعدام شاب آخر كان معتاقل بسبب الاحتجاجات، وفنفس الوقت الأمم المتحدة قالت بلي كاين ارتفاع كبير فالإعدامات والاعتقالات (كثر من 4000 معتاقل) من بدات الحرب .

حسب إعلام إيراني، ساسان آزادوار، اللي هو رياضي كاراتيه من أصفهان، تعدم فحبس دستجرد. العائلة ديالو قالت بلي الجنازة دازت حسي مسي، وما خلواش غير عدد قليل من العائلة يحضرو.

الأمم المتحدة قالت بلي على الأقل 21 واحد تعدمو  فهاد الفترة، وحذّرات من استعمال عقوبة الإعدام فهاذ الظروف.

السلطات الإيرانية اتهماتو بـ”محاربة الله” والتعاون مع العدو، وقالو بلي كان كيرمي الحجر على قوات الأمن وشارك فالهجمات وسط الاحتجاجات، ولكن التقرير ما جاب حتى شي ذكر لإصابات خطيرة فصفوف الأمن.