كود سبور//

غاتلعب الملاكمة المغربية خديجة المرضي بطلة العالم 2023 فوزن اكثر من 81Kg ، غدا الاحد فالصباح، ربع نهائي أولمبياد باريس 2024، وعينها على تحقيق التأهل للدومي فينال وضمان على الأقل أول ميدالية للمغرب فهاد النسخة من الأولمبياد، على اعتبار أن صاحبة المركز الثالث والرابع فالبوكس كياخدو الميدالية البرونزية.

وفالكومبا ديال ربع نهائي البوكس فوزن أقل من 75Kg، غاتلعب خديجة المرضي بطلة العالم مولات 33 عام واللي عندها متر و83 فالطول، ضد الاسترالية باركر كيتلين مولات 28 عام واللي عندها فالطول ميتر و75، فكومبا من المنتظر تكون صعيبة بين الملاكمتين.

وعبرت خديجة المرضي بعدما غلبت البريطانية شانتيل فيوميا فثمن النهائي، وقالت فتصريح لها: “هادي غير البداية ومازال الفرحة جايا اللي غاندخلو بها البوديوم ضد الأستراليا، وكنهدي هذا الرباح للملك محمد السادس بمناسبة عيد العرش وغنادير كل ما فجهدي باش نزيد نفرح ملكنا والمغاربة، باش نكونو فالبوديوم والعلم الوطني يكون خفاق فباريس”.

وبالنسبة للاسترالية باركر كيتلين، فهي ملاكمة ما شي سهلة وقوية وهي وصيفة بطلة العالم 2023 فوزن أقل من 75Kg، وتأهلت إلى ربع نهائي أولمبياد باريس، بعدما ربحت الميكسيكية أورتيز فانيزا.

ومعولين المغاربة على البطلة العالمية خديجة المرضي لضمان أول ميدالية فأولمبياد باريس2024، في انتظار إنجاز من العداء الأولمبي سفيان البقالي والمنتخب المغربي لكرة القدم، ومعول عليها البوكس المغربي للتتويج بميدالية فهاد النسخة بعد إقصاء وداد برطال من ربع النهائي مع العلم أن آخر ميدالية ربحها المغرب فالبوكس كانت بواسطة محمد ربيعي فأولمبياد ريو2016.