وكالات //

وقفو مفتشو الديوانة فمطار بارانول فروسيا واحد السيدة جاية من فيتنام، بعدما لقاو عندها قرعة ديال الشراب فيها كوبرا محنّطة، وكانت باغية تدخلها للبلاد بلا تصريح رسمي، فواقعة غريبة شدت اهتمام الإعلام الروسي.

وحسب ما قالت ألينا كيكيينا، المتحدّثة باسم جمارك إقليم ألطاي، لقاو المفتشين القرعة وسط الأمتعة ديال السيدة فالتفتيش العادي، وكانت القرعة عليها واحد الملصق التجاري مكتوب فيه “نبيذ الأفاعي”، وهو مشروب معروف فشي دول آسيوية. ومنين فحصوها مزيان، لقاو فيها أفعى محفوظة فالكحول وزيد عليها جذر نباتي.

وقدّرات التحاليل المتخصّصة تحدّد باللي هاد الأفعى هي من نوع الكوبرا المونوكلية، وهاذ النوع سام بزاف ومصنّف فالاتفاقية ديال “سايتس” اللي كتحمي الكائنات المهددة بالانقراض، وهادشي كيفرض قيود قوية بزاف على التجارة ديالها وتنقيلها بين الدول.

وجدير بالذكر أن الكوبرا المونوكلية كتكون فدول آسيوية بحال الهند، تايلاند، و فيتنام، وكتوصل فطولها ما بين 120 و150 سنتيمتر. وكيمنع القانون إدخالها لروسيا بلا رخص قانونية وبيطرية خاصة.

وبناءً على نتائج التحقيق، فتحت الجمارك جوج ديال القضايا الإدارية ضد المسافرة وفق المادتين 16.2 و16.3 من قانون المخالفات الإدارية فروسيا، بتهمة عدم التصريح بالبضائع ومخالفة القيود ديال استيراد المواد المحظورة.