وكالات//

وقّفات السلطات الأسترالية مراة عندها 40 عام، من بعدما حاولت تهرّب 15 كيلو ديال مخدر الميثامفيتامين، كانت مخبّية داخل كيسان متسجّلين على أنهم “أتاي”، وذلك أثناء تفتيش أمني عادي فمطار سيدني الدولي نهار 26 دجنبر الجاري.

وكيقول بلاغ مشترك ديال الشرطة الفيدرالية الأسترالية وقوات الحدود، التفتيش كشف على 18 كيس مسدودين مزيان ومفرّغين من الهواء، فيهم مادة بلورية شفافة، والاختبارات الأولية بيّنت أنها مخدر الميثامفيتامين.

وحسب هيئة الاستخبارات الجنائية الأسترالية، القيمة ديال هاد المخدرات فالسوق كتفوت 13 مليون دولار، يعني تقريباً 150 ألف عملية بيع ديال المخدرات.

تشدّات المراة وتصادرت المخدرات، وتوجّهت ليها تهمة استيراد كمية تجارية من مخدرات خاضعة لمراقبة الحدود، وهي جريمة العقوبة القصوى ديالها هي السجن المؤبد.

وقال المفتش مورغن بلوندن من الشرطة الفيدرالية:”هاد الشي تذكير مهم للمسافرين باش ما يثقوش فالأشخاص ولا الجماعات اللي كيعرضو الفلوس مقابل نقل الأمتعة، حيت العواقب ما كتستاهلش المخاطرة”.