سيدي رحال – كود//

قالت بعض المصادر إن واحد الشاب في العمر ديالو شي 19 أو 20 عام تقتل البارح الخميس في الليل بدوار مول العلام في سيدي رحال الشاطئ.

وقالت نفس المصادر إن هاد الضحية اللي تقتل بطعنة السكين ديالو كيفما كا يحكي بعض الناس، كان دخل في صراع مع جوج ديال الخوت واحد قاصر والثاني في عمرو 22 عام.

وزادت مصادر (كود) أن الضحية كان حدا لزيات وشي هاتف محمول لأحد الشقيقين، وهو ما خلاهم يتحماو عليه باش ياخذون الهاتف ديالهم، لكن الضحية اللي يظهر أنه كان مبحوث عليه لأنه محترف السرقة قاومهم وجبد عليهم موس، وهو السبب اللي كان وراء القتل ديالو.

هاد الجريمة وقعات في منتصف ليلة البارح الخميس، وتمكنات عناصر الدرك الملكي من اعتقال المشتبه بهم في هاد الجريمة.

ولكن هاد الشي ما كا يمنعش باش نقول ا أن الجريمة بمختلف أنواعها متفشية في سيدي رحال الشاطئ، وخاص الدرك الملكي يبذل مجهودات كبيرة باش يقضي عليها، خاصة ترويج المخدرات ومنها المخدر الخطير البوفا، وكذا انتشار أوكار الشيشة اللي بزاف ديال القهاوي كا تنشط فيها وهي المصدر ديال الدخل ديالها الكبير.