كود الرباط//

أعلن وزير الثقافة والشباب والتواصل، محمد المهدي بنسعيد، على إطلاق آلية جديدة غادي تمكّن الصحافيين يستافدو من حقوقهم المادية والمعنوية على المقالات ديالهم، بشراكة مع المكتب المغربي لحقوق المؤلف والحقوق المجاورة. الغلاف المالي للمشروع كيوصل لحوالي 3 ملايير سنتيم وغادي يتوزع على مدى عامين، مع استفادة مباشرة للصحافيين ونسبة كذلك للمقاولات الإعلامية.

الوزير وضّح باللي هاد التعويض ماشي أجر إضافي، ولكن حق قانوني مرتبط بحقوق المؤلف، حيث أي صحافي كيتعتبر مؤلف ديال المقال ديالو وعندو حق معنوي ومادي على المحتوى، خصوصاً فحالات الاستنساخ أو الاستغلال بوسائل تقنية.

مديرة المكتب، دلال محمدي علوي، أكدت باللي التعويض غادي يكون فإطار نظام “الاستنساخ التسويقي”، يعني المداخيل اللي كتجي من الرسوم المفروضة على أجهزة بحال الاستنساخ والماسحات الضوئية على المقالات،. هاد المداخيل كاتجمه ومن بعد كتتوزع على أصحاب الحقوق.

فالمرحلة الأولى، اللي غادي تمتد لـ10 شهور، غادي يتم التركيز على الصحافيين والمؤسسات الصحافية، قبل ما يتعمم النظام على فئات أخرى. وغادي يتم اعتماد بوابات إلكترونية للتصريح بالمقالات اللي كتتوفر فيها شروط الإبداع والابتكار، حيث المواد الإخبارية البحتة اللي غير كتَنقل الخبر بلا قيمة تحريرية مضافة ما غاديش تستافد.

التعويض غادي يكون مرة فالسنة، وفق آليات مضبوطة لضمان الشفافية، والهدف هو تعزيز الحماية القانونية للإنتاج الصحافي وتكريس حق الصحافي فالعائدات ديال استغلال أعمالو.