كود سبور//

واحلين تي بي مازيمبي الكونگولي فبلادهم الكونگو الديموقراطية بسبب عطب فطيارة ديال الخطوط الملكية المغربية، اللي كان المفروض تنقلهم إلى المغرب وبالضبط مطار محمد الخامس بالدار البيضاء ومن تما ياخدو رحلة تديهم إلى موريتانيا باش يلعبو الاحد الجاي مع الهلال السوداني دوري أبطال افريقيا (الهلال السوداني كايلعبو فموريتانيا بسبب الحرب فالسودان)، ولكن بسبب عطب فالطيارة الاولى راه باقيين مازيمبي حاصلين فكينشاسا.

وحسب بلاغ لتي بي مازيمبي الگونگولي، خرج الفريق من مدينة لوبومباشي الكونگولية المعقل ديالو مساء الأربعاء 4 ديسمبر باش يمشيو للعاصمة الكونگولية نواكشوط عبر عاصمة الكونگو الديمقراطية كينشاسا والدار البيضاء المغربية.

ووضح النلدي الكونگولي أنه كان من المقرر تشد بعثة الفريق الطريق من العاصمة الكونگولية كينشاسا في اتجاه الدار البيضاء يوم الخميس الماضي مع 6:15 د الصباح، وطلعو اللاعبين والأطقم ديال الفريق إلى الطائرة ديال لارام ودازت 3 السوايع على موعد الاقلاع وبعثة الفريق كايتسناو فالطيارة تطير ولكن ما قلعتش ونزلت البعثة ديال مازيمبي ومشاو گلسو فالصالون ديال الانتظار بالمطار ديال كينشاسا، ومن بعدها ملي وصلت 10:30 ديال الصباح تخبرو بأن الرحلة تقرر إلغاؤها وقالو أن لارام عطاتهم وعد بأنها غاتلقى حل للمشكلة الفنية ديال الطيارة دغيا.

وكملو مازيمبي وقالو انهم اضطرّوا يقلبو على فندق فين يگلسو بينما وصل موعد الرحلة الجديدة اللي تم الاتفاق عليه ما لارام يوم الجمعة مع 00:05، ووصل الموعد وتصدمو حيث بعدما طلعو للطيارة وبعد محاولات ما قدراتش الطيارة تقلع ووصلت 3:00 الصباح وما شداتش الطريق.

وعبرت ادارة مازيمبي الكونگولي عن قلقها بأن الفريق يقدر ما يوصلش فالموعد ديالو إلى العاصمة الموريتانية نواكشوط باش يلعب ضد الهلال السوداني، وهذا الشي بعدما تعلمو أنهم غايقلعو من كينشاسا إلى الدار البيضاء مع 4 الصباح ديال غدا السبت، ولكن خايفين ما يلقاوش رحلات جوية من الدار البيضاء إلى نواكشوط وحملو شركة الخطوط الملكية المغربية المسؤولية فهذا المشكل اللي واقع لهم.