وكالات //

شاب دار كارثة وحرق غابة كبيرة، غير حيت لقى كَرادة فوق المخدة ديالو وبغا يتفك منها.

حسب وسائل إعلام تركية، محمد اللي عندو 31 عام، شاف كرادة فوق المخدة ديالو، وعوض ما يزولها بطريقة عادية، قرر يشعل فيها العافية، ومن بعد رماها فحديقة دارهم فبلدة “توغوتلو” فولاية مانيسا غرب تركيا.

العافية شعلات فالمخدة وانتشرت بسرعة، ودازت لمناطق واسعة، وتسببات فحريق غابة فواحد المنطقة برية، قبل ما يتدخلو رجال الإطفاء اللي دارو مجهود كبير باش يطفيوها.

السلطات المحلية قالت إن الحريق اللي وقع فليلة الأحد، خلا حوالي خمسة آلاف متر مربع تتحول لرماد، وهادشي خلا البوليس يوقفو محمد ويفتحو معاه تحقيق.

الشرطة منين دارت التحريات، لقات أن السبب هو هذيك لمخدة اللي حرقها محمد، وهو بنفسو اعترف باللي شعل فيها العافية ورماها حيت لقا فيها كرادة.

غادي يتحاكم محمد، خصوصاً فواحد الفترة اللي كتعاني فيها البلاد من سلسلة ديال الحرائق .

وزادت المخاوف فتركيا من الكراد، حيث تسبب فوفاة حوالي 20 شخص من بداية العام، والأطباء كيديرو تحذيرات بخصوص الخطورة ديال هاد الحشرة اللي كتقدر تنقل فيروس خطير اسميتو “حمى القرم – الكونغو النزفية .(CCHF)”