وكالات//

أحالت محكمة أمريكية شركة “تيسلا” للمحاكمة بسبب حادث مأساوي وقع فولاية فلوريدا فـ2019، ماتت فيه شابة سميتها نايبيل بينافيديس، بعدما ضرباتها سيارة من نوع “موديل “S” كتخدم بنظام القيادة الذاتية، وكانت الشابة مستلقية كتشوف النجوم فواحد الوقت متأخر من الليل.

التحقيقات بيّنت أن الضحية طارت لأكثر من 22 متر بعد الصدمة، وصاحبها تصاب بجروح خطيرة. ورغم أن السائق، جورج ماكغي، دار تسوية منفصلة مع عائلتي الضحايا، إلا أن المحامين ديالهم كيأكدو أن “تيسلا” مسؤولة حتى هي، حيث النظام ديال السيارة ما عطاش حتى إنذار وما فرملش، رغم أن السيارة كانت كتجري بزاف وتجاوزات إشارات المرور.

من جهتها، تيسلا كتقول بللي ماعندهاش علاقة بالحادث، وكتحمّل المسؤولية للسائق اللي كان مشغول بهاتفو وقت الاصطدام. ولكن المحامين ديال العائلة كيردو أن الشركة تجاهلات تحذيرات كثيرة من قبل، وأن المسؤولية مشتركة بين السائق والتكنولوجيا اللي فـالسيارة.

هاد المحاكمة نادرة وجات فواحد الوقت اللي ولى فيه إيلون ماسك، رئيس تيسلا، كيتعرض للتدقيق بخصوص السلامة ديال السيارات الذاتية، خصوصاً من بعد ما تم استدعاء أكثر من 2.3 مليون سيارة فـ2023 بسبب مشاكل فـنظام التنبيه المرتبط بهاذ الخاصية.