كود سبور//

من المنتظر يتبدل موعد ماتش الوداد الرياضي والضيف ديالو اتحاد طنجة، برسم الدورة 10 من البطولة الاحترافية واللي كان مبرمج الاحد الجاي قبل ما تخربق شومبيونزليگ ديال العيالات الأمور، وهي المسابقة اللي غاتلعب فتيران العربي الزاولي بالدار البيضاء وتيران العبدي بالجديدة ابتداء من السبت الجاي.

وحسب مصادر مطلعة، فكاين مقترح باش يتلعب ماتش الوداد الرياضي واتحاد طنجة يوم الجمعة المقبل مع 8 الليل فتيران العربي الزاولي بالدار البيضاء، فبلاصة الاحد الجاي مع 8 الليل فتيران البشير بالمحمدية.

نفس المصادر وضحت ان الوداد الرياضي باغيين يلعبو الجمعة مع 8 الليل فتيران العربي الزاولي، ولكن خاص موافقة العصبة الوطنية لكرة القدم الاحترافية وفريق اتحاد طنجة، حيث ديجا البروگرام ديال الماتش خارج.