الوالي الزاز -كود- العيون///
أعلن مجموعة من أعضاء الغرفة المغربية لمنتجي الأفلام استقالاتهم، اليوم الأربعاء الموافق لتاريخ 3 أبريل 2024.
وعلى حساب الاستقالات اللي توصلات بيها “گود”، فالسبب ديالها هو التفرد بالقرارات والفوضى اللي داير رئيسها جمال السويسي، بالإضافة لأسباب شخصية وأخرى مرتبطة بتدبير الغرفة، على حساب ما قالوا المستقيلين.
وكيشوفو بعض أعضاء الغرفة على أن الإطار اللي جات من أجلو هاد الغرفة ما بقاش نفسو وتم إخراجها عن مسارها من تجويد الفن والارتقاء بالسينما المغربية إلى مسار آخر خلى منتجي الأفلام بعيد على مبدأ تكافؤ الفرص ومسار كيهدد مستقلبهم.
وفالسياق نفسو، قالت مصادر مهنية لـ “گود”، إن اسم الغرفة المغربية لمنتجي الأفلام أصبح ملازم لعديد من التجاوزات الشي اللي كيفتح المجال أمام استقالات جاية فالساعات القادمة.
وأضافت المصادر، أن وزارة الثقافة والشباب ولات فموقف محرج بسباب هاد الأزمة اللي كاينة عند الغرفة المغربية لمنتجي الأفلام والاتهامات الموجهة للناس اللي كتسيرها، مطالبة بفتح تحقيق والإجابة على التساؤلات اللي كاينة بخصوص سوء التدبير.