وكالات//

مات سائح أسترالي فالتايلاند بسبب حادث غريب، من بعدما تساطح مع باب ديال الزاج داخل واحد المطعم فواحد الوقت متأخر من الليل.
وقالو البوليس أنهم توصلو ببلاغ على شي فوضى وقعات داخل مطعم كابادوكيا التركي فمنطقة كارون فمدينة بوكيت، والبلاغ كان كيهضر على واحد الأجنبي.
ومن اللي وصلات البوليس لعين المكان، لقاو باب ديال الزاج مهشّم كامل، وزيد عليها بركة كبيرة ديال الدم فالأرضية ديال المطعم.

التحقيقات بيّنات أن السائح الأسترالي تْنقل بسرعة لمستشفى تشالونغ، ولكن توفّى من بعد بسبب نزيف خطير ناتج عن جرح عميق فالساق اليمنى ديالو.
وتسجيلات كاميرات المراقبة اللي كاينة داخل المطعم ورّات أن السائح دخل بوحدو وجلس فواحد الطابلة، ومن بعد ولى كيشد الانتباه بتصرفات ماشي عادية، الشي اللي خلا شي زبائن قريبين منو يبعدو عليه.
وحسب الفيديوهات، بان الراجل كان فحالة ديال ارتباك وتشوش، وكان كيهز راسو بزاف، ومن بعد ناض فجأة وجرى بقوة نحو الباب ديال الزاج وهو كيغوّت.