گود سبور//

كايبان أن الخلافات بين الوداديين غير كاتزاد وكاتكبر، بسبب التسيير والتعربيز ديال الرئيس الحالي هشام ايت منا اللي غرق النادي فالتدبير الانفرادي والعشوائي، وهذا راه وصل للانشقاقات داخل المكتب المديري للنادي.

وقرر محمد طلال الناطق الرسمي للوداد الرياضي، والعضو اللي دوز 11 عام فالمكتب المديري للنادي من ايام الرئيس الأسبق سعيد الناصيري، (قرر) الاستقالة من المنصب ديالو، وأعلن عنها قبل لحظات على الصفحة ديالو فالفيسبوك.

وحسب مصادر “گود” راه الاستقالة ديال محمد طلال هي الأولى من مكتب هشام ايت منا وما غاديش تكون هي الأخيرة، ولكن جايين استقالات وحدين اخرين ديال أعضاء فالمكتب، اللي طلع لهم الدم من طريقة تسيير ولد لفشوش للنادي، خصوصا بعد الاجتماع اللي كان ورا فضيحة المشاركة فمونديال الأندية واللي خلاهم كايتسناو.

وتوقعت نفس المصادر، تخرج استقالة اخرى خلال الساعات والأيام المقبلة من ورا خطوة محمد طلال، احتجاجا على الوضع اللي وصل له هشام ايت منا النادي، خصوصا وأن الوداديين تبين لهم أن ولد فضالة كان غير طالقها عليهم، والوعود اللي عطاهم بإعادة النادي للقوة ديالهم غير هضرة وكذوب وهو فالحقيقة غير ركب على إنجازات الرئيس الأسبق سعيد الناصيري اللي وصل النادي للعالمية، كيفما ولى ملاييري بفلوس بوه الحاج ايت منا، بلا ما يضرب فيهم تمارا وفبلاصة مايزيد يكبر الثروة قلات له حيث ما عندوش عقل رجل الأعمال.