وكالات//

تلغات على الأقل 20 رحلة جوية من وإلى جزيرة بالي فإندونيسيا، نهار الأربعاء، حسب ما قالت السلطات والمطار ديالها، بسبب ثوران ديال بركان فشرق الأرخبيل، اللي طلق سحابة ديال الرماد وصلات للعشرة كيلومتر فالعلو.

البركان اللي ثار هو جبل سميتو “ليووتوبي لاكي-لاكي”، اللي كيوصل علوه لـ1584 متر، فجزيرة فلوريس السياحية فالشرق، وثار نهار الثلاثاء، وداكشي خلا السلطات ترفع حالة التأهب لأعلى مستوى.

الموقع الإلكتروني ديال مطار بالي قال بللي الرحلات اللي تلغات كانو تابعين لشركات بحال “جيت ستار” و”فيرجن أستراليا”، وكانو غاديين لمدن فمختلف المناطق فأستراليا. حتى شركات بحال “إير إنديا”، “إير نيوزيلاند”، “تايغر إير” من سنغافورة، و”جونياو إيرلاينز” من الصين، حتى هما لغاو الرحلات ديالهم “بسبب البركان”.

وزيد عليهم، حتى بزاف ديال الرحلات الداخلية ديال “إير إيجا” المتوجهة لـ لابوان باجو فجزيرة فلوريس، تلغات.

وقالت الوكالة الوطنية لتدبير الكوارث فإندونيسيا بللي الرماد البركاني طاح على عدد من الدواوير اللي حدا ليووتوبي لاكي-لاكي، ودعات الضرورة يخليو سكان واحد الدوار على الأقل منازلهم ليلة الثلاثاء.

وزادو قالو كيتسجلو هزات أرضية، وهادشي كيعني بللي النشاط البركاني مازال مستمر.