وكالات //

تصدّرات الفنانة أنغام الطوندونس فمحركات البحث فالساعات الأخيرة، بعدما خرجات عن الصمت ديالها وردات على الاتهامات اللي توجهات ليها بسباب الفنانة شيرين عبد الوهاب.

وهادشي جا من بعد ما بداو كيدورو إشاعات كيقولو باللي هي اللي من ورا حملات فالسوشيال ميديا كتهاجم شيرين، خصوصا من بعد الحفل ديالها الأخير فمهرجان موازين.

أنغام دارت مداخلة هاتفية مع الإعلامية لميس الحديدي فبرنامجها “كلمة أخيرة”، وبدات كلامها بأنها ما بغاتش تدافع على راسها، حيت ما كتفضلش تدخل فالمتاهات أو ترد على الشائعات، ولكن هاد المرة تعرضات للظلم بشكل كبير، وتعرضات حتى للسبّ بطريقة ما مقبلاش.

أنغام ما تفهماتش علاش كيربطو اسمها بالمشكل اللي وقع مع شيرين، وقالت: “شنو دخّلني أنا فهادشي؟ واش غير حيث كنت فالسبيطار؟ وحتى لو كنت فداري ولا خدامة، شنو علاقتي؟”.

وزادت وقالت: “ماشي أول مرة كيوقع هادشي، ولكن هاد المرة كانت قاسية بزاف. أنا تحملت ثلاث سنين ولا أربع ديال التلقيح، ماشي غير من الجمهور ولكن حتى منها شخصيا، وعمري علّقت، كنت كنتقلق فصمت، وكنت كنعذرها بزاف وسديت الموضوع نهائياً.”

وختمات كلامها بإن الأخبار اللي كيدورو ماشي صحيحة، وإنما أفكار داروهم الناس اللي قراب من شيرين فراسها، وطلبات من الناس يحبّو شيرين ويدافعو عليها بالطريقة اللي بغاو، ولكن بلا ما يجبدو اسمها فالموضوع.