وكالات//

هاد السيمانة، رجع واحد الفكرون كبير لي كان خاضع للحماية في بانكوك، وغا يرجع لتنزانيا لي هو البلد الأصلي ديالو، وهادشي جا نتيجة لعملية تحقيق طويلة كان الهدف ديالها هو تفكيك شبكة ديال المهربين لي كيتاجروا في الأنواع المحمية.

العملية هادي خلات البوليس الدولي “الإنتربول” أنه يوقف 15 شخص من أفراد هاد الشبكة، حسب ما قالوه فبيان الجمعة.

المدير التنفيذي المكلف بخدمات الشرطة فـ”الإنتربول” سيريل غو قال فبيان ليه إن هاد القضية كتبرز العزيمة ديال أجهزة الأمن الدولية فحماية الأنواع المهددة بالانقراض، وكتبين الجهود باش يقضيو على التجارة غير القانونية فالحيوانات البرية ويحاسبوا المجرمين.

العملية بدات ف يوليوز 2022 فمطار بانكوك بعدما لقاو 116 فكرون صغير فصيكان ديال سيدة أوكرانية جاية من دار السلام.

حسب ما شرحات الشرطة الدولية، الفكارن هادو كانوا من أنواع محمية فموجب اتفاقية “سايتس” (اتفاقية التجارة الدولية في الأنواع المهددة).