كود -وكالات //

واحد الترند بسيط سميتو “أركضلي”، دارو واحد الولد فليبيا مع ختو الصغيرة احتفال بنجاحها فالقراية، ولكن اللي ما كانش متوقع هو أن هاد الفيديو يقلب الدنيا فالسوشيال ميديا، ويتحول لنقاش كبير وصل حتى للسياسة والتعليم.

بسباب هاد الترند، وزير التربية والتعليم د ليبيا خرج بقرار كيمنع الاختلاط بين الدراري والبنات فالثانوي، وفرض أنهم يكونو مفصولين حتى فالأنشطة والساحات، الوزير برر هاد القرار بأنه كاينين تجاوزات خاصها تصحيح، وأن خاص الحفاظ على القيم ديال المجتمع.

https://www.facebook.com/reel/962454516474553/?mibextid=9drbnH&s=yWDuG2&fs=e

ولكن بزاف ديال الناس ما عجبهمش الحال، وقالو بأن المشكل الحقيقي ماشي هو الاختلاط، بل هو التربية والأخلاق. وزادو قالو بأن التعليم فليبيا ديما كان مختلط، وما كانش فيه مشكل.

من جهة أخرى، حقوقيين حذرو من خطورة اللي وقع، حيث قالو بأن الناس بداو كيشوفو حتى العلاقات العائلية البريئة بعين الشك، وهذا كيعكس واحد الثقافة اللي فيها خوف مبالغ فيه من الجسد. وحتى الأطفال ولاو معرضين للتنمر والوصم بسبب هاد النظرة.

وزادو أكدو بأن الدولة خاصها تركز على مشاكل أكبر بحال نقص الكتب، وضعف المدارس، بدل قرارات بحال هادي. وخلاصة القول، هاد القضية بينات أن المجتمع كيعاني من خلط بين القيم الحقيقية وردود الفعل المبالغ فيها.