كود الرباط//

قال وزير العدل، عبد اللطيف وهبي، بلي ف عدد من المرات فكر ف الرحيل من الحكومة بسبب الصعوبات لي عاش ودوز فوسط الحكومة فتمرير عدد من القوانين.

وهبي وهو كيهضر ف حالة حزن ومعجبوش الحال وهو مقيد وسط الحكومة، قال بلي الوزير يتيم في مأدبة اللئام.

كلام الوزير جا ف سياق حديثو على اختصاصات وحرية الوزير ضمن الحكومة، وعطا مثال إنجليزي بلي الملك لا يحكم لوحده، وأشار بلي كاين صعوبات ف العمل الحكومي كفريق.

واعترف وهبي، بلي مقدرش ينجح يدوز عدد من القوانين، وقال بلي فكر فالرحيل من الحكومة وتصاب باليأس.

وأوضح وهبي، خلال مناقشة الميزانية الفرعية لوزارة العدل، بلي وصل لدرجة اليأس. وقال بلي موظف فشي قنت كيقول لوزيرو لا والوزير يجي يرفض المقترح.

وهبي قال بلي الممارسة السياسية فالمغرب جد بطيئة، وذكر بمسار المصادقة على مشاريع القوانين، وعطا مثال غير قانون العقوبات البديلة لي مشا ورجع من الحكومة 3 مرات، ونهار خرج تعطا لمندوبية السجون.

وزير العدل عطا معطيات عديدة بلي الادارة بطيئة منها قضية المحجوزات فالمحاكم لي سنوات وهي فالحجز. وملي اقترح وكالة لبيع هاد المحجوزات قال وهبي ترفض ليه المقترح واعتبر هادشي “ضياع لأموال الدولة وأموال الشعب”.