كود – عثمان الشرقي//

قرر كل من الفنان الشعبي والأمازيغي بدر أوعبي والفنان عبد العزيز أحوزار يوقفو جميع سهراتهم ومشاركاتهم الفنية بشكل مؤقت، على قبل الفيضانات والظروف الاستثنائية اللي كتعرفها بلادنا فهاد الفترة، كتعبير على التضامن مع المواطنين وحرصاً منهم على السلامة العامة.

بدر أوعبي خرج بفيديو نشرو مؤخراً، وبلغ فيه الجمهور ديالو بقرار تأجيل جميع السهرات والمهرجانات اللي كانت مبرمجة، بلا ما يحدد تاريخ معيّن، ؤوضح أن هاد الخطوة جات احتراماً للوضع الراهن، وانسجاماً مع التوجيهات الرسمية، وحرصاً على سلامة الجمهور والمنظمين.

وحسب مصادر قريبة من الفنان، فالقرار ما كانش متسرّع، وإنما جا بعد تفكير وتقدير لحساسية المرحلة اللي كتمر منها البلاد، عدد كبير من المتابعين اعتابرو هاد الخطوة موقف مسؤول، كيعكس وعي الفنان بالدور ديالو الاجتماعي وتضامن صادق مع المتضررين من الفيضانات.

من جهتو، أعلن الفنان عبد العزيز أحوزار بدورو على توقيف جميع سهراتو الفنية مؤقتاً إلى إشعار آخر، وأکد أن القرار جا احتراماً للوضع العام وتضامناً مع المواطنين، وشدد على أن الفن خاصو يكون ديما منسجم مع هموم المجتمع والظروف اللي كيدوز منها ماشي معزول عليها .

الفنانين بجوج توجّهو برسالة لجمهورهم، طالبين منهم التفهم والصبر فهاد المرحلة، وواعدوه بالرجوع لإحياء السهرات واللقاءات الفنية فأقرب وقت ممكن، بنفس الحماس والطاقة اللي تعوّد عليها الجمهور.

رواد مواقع التواصل الاجتماعي تفاعلو بشكل كبير مع هاد القرار، وعبّرو على دعمهم واحترامهم للفنانين، وتمناو السلامة للجميع، وعودة قريبة للفرجة والفن الشعبي والأمازيغي اللي كيبقى متنفس ثقافي مهم وعزيز على قلوب بزاف دالناس.