كود -وكالات//

فواحد العملية الأمنية اللي ماشي عادية، خرج الرئيس الأمريكي دونالد ترمب من تركيا وسط إجراءات مزيرة بسباب الخوف من تهديد ايراني.

وحسب معلومات نقلاتها مصادر أمريكية، ترمب بان قدّام الكاميرات وهو طالع للطائرة الرئاسية «إير فورس وان» فأنقرة، ولكن من بعد تبدلات الخطة، وتقرر يتنقل بشكل سري فطائرة أخرى صغر.

وباش يدوز لهاد طيارة ما تنقلش بالطريقة عادية ،وانما تم استعمال كاميو ديال للمطار باش يخرج من الطائرة ويتنقل بعيد على الأنظار.

وفنفس الوقت، تعطات تعليمات للصحافيين اللي كانو مرافقين للرئيس باش يسدو الشراجم ديالهم، الشي اللي خلاهم ما يعرفوش شنو تبدل فترتيبات الرحلة حتى فاتت العملية.

هاد الإجراءات كلها جات وسط مخاوف أمنية مرتبطة بتهديد إيراني محتمل، وخلات تساؤلات كثيرة تطرح على طبيعة التهديد اللي خلا السلطات الأمريكية تبدل ترتيبات سفر الرئيس فآخر لحظة.

وحتى لدابا، مازال ما توضحاتش بشكل رسمي طبيعة التهديد اللي كان مطروح، ولا علاش بالضبط تقرر نقل ترمب بهاد الطريقة السرية، في انتظار معطيات رسمية أكثر على هاد العملية الأمنية .