كودـ كازا//

توصلات “كود” بمعطيات كاتقول بلي “لابيجي” ديال كازا التابعة لأمن أنفا فالدارالبيضاء تمكنت، أخيرا، من اعتقال واحد من أخطر المبحوث عنهم فالسوالم، اللي هو “كمال.ع”، نجل واحد من أعوان السلطة العاملين فالمنطقة.

عملية الإيقاف اللي تمت بعين الذئاب، جات بعد ما كان هاد الشخص كا يصول ويجول في السوالم والخيايطة بلا ما يتشد.

المعطيات اللي توصلات بها “كود” كتكشف أن المدعو “كمال.ع” كان موضوع مذكرات بحث صادرة مباشرة عن الدرك الملكي، ومع ذلك كان كيتحرك بكل حرية فالسوالم ، بلا ما يتعرض لأي إيقاف. وخا روشيرشي كان ما يوزع الممنوعات اللي كا يتاجر فيها حيت عندو بزاف ديال الزبائن اللي كا يقلبو عليه ويتبعوه فين ما كان.

النتيجة ديال هاد الوضع كارثية، مناطق شاسعة خاضعة لنفوذ الدرك الملكي فالسوالم، وسيدي رحال والخيايطة الساحل، تحولات لبؤر خطيرة لتجارة جميع أنواع السموم: لحشيش، القرقوبي، البوفا، الكيف، وحتى الخمور، كيتباعو على عينيك أ بنعدي لا حسيب ولا رقيب، واللي محتاج أي نوع من المخدرات يلقاه بسهولة في هاد المناطق اللي ولات وجهة مشهورة للمدمنين.

اعتقال “كمال” من طرف الأمن الوطني فالبيضاء، ورغم أنه كان تحت أعين الدرك الملكي فالسوالم، كيعطي صورة واضحة على مستوى التراخي الأمني اللي كتعرفو هاد المنطقة. وهو إنذار كا يبين أن المعركة ضد شبكات المخدرات غادي تبقى خاسرة إلى ما كانش الحزم وحملات التطهير من الداخل.

وصرحات بعض المصادر من الساكنة أن الوضع خايب ومقلق والمطلوب هو تكثيف المجهودات الأمنية باش يتم القطع مع مروجي المخدرات في السوالم والخيايطة وسيدي رحال.