كود: خميس الزمامرة//
كتعيش مدينة الزمامرة هاد الأيام على وقع واحد الفضيحة اللي صدمات الساكنة، بعدما تعرض واحد الشخص لاعتداء خطير خلّف ليه عاهة مستديمة فرجليه، والفاعل حسب مصادر محلية معروف كتاجر ديال الحشيش وكيخدم وسط النفوذ الترابي ديال الدرك الملكي فالمنطقة.
الضحية مازال كيعاني الألم ديال الاعتداء الجسدي والنفسي، ورغم أنه دار شكاية رسمية عند الدرك الملكي فالزمامرة هادي كثر من خمسة شهور، وزادها بشهادة طبية من مستشفى الجديدة كتأكد نسبة العجز اللي عندو، القضية بقات جامدة وما تحرك فيها والو. المشتكى به باق حر طليق وكيمارس نشاطو الممنوع بكل أريحية.
القضية اليوم كتطرح بزاف ديال علامات الاستفهام: واش المواطن البسيط ما عندوش حق فالحماية فالزمامرة..؟ واش القانون كيتطبق غير على الضعاف ف هاد المنطقة؟ كيفاش ضحية معطوب ومهرس كا يعاني فصمت، والجاني باقي كيتحدى الدولة والناس..؟
