ݣود- عثمان الشرقي//

المرصد الوطني لمحاربة الرشوة وحماية المال العام عبّر على قلقو الكبير من التحذير اللي خرجات به الحكومة البريطانية لمواطنيها، واللي نصحتهم يردّو البال ملي يشربو الشراب فبعض الدول، ومن بينها المغرب، المرصد قال باللي ذكر اسم المغرب فهاد السياق خاصو يجي مع توضيحات رسمية، حيت صحة الناس والحق فالمعلومة ماخاصهمش يبقاو غامضين.

وشدّد المرصد باللي حماية صورة المغرب كبلاد سياحية وآمنة كتبدأ من حماية صحة المواطنين والسياح وضمان سلامة المواد اللي كتتباع فالسوق، سواء منظمة ولا لا. وطالب السلطات المختصة باش توضح المعطيات اللي خلات بريطانيا تصنّف المغرب فخانة الخطر فموضوع الخمور، وتنشر بانتظام أي حالات تسمم أو ملاحظات عن شراب مغشوش.

وزاد المرصد يطالب بفتح تحقيقات دقيقة باش يعرفو فين كاين الخلل فمسار تصنيع وتوزيع وبيع الخمور، ويطبّقو القانون على أي واحد كيغش ولا كيتاجر فشراب كيهدّد الصحة العامة، سواء كان منظم ولا لا. وذكر الحملات السابقة اللي دارتها السلطات وحجزت كميات كبيرة من القراعي المغشوشة، وطلب توسيع هاد الحملات لتشمل جميع المحلات، خصوصاً المدن السياحية والمناطق اللي فيها كثافة شباب وسياح.

هاد التحذير البريطاني اللي كان خرج قبل 4 أيام حذر من خطورة مادة “الميثانول” فبعض المشروبات الكحولية فالمغرب، وقال باللي ممكن تسبب الوفاة أو أمراض خطيرة حتى ولو بكميات صغيرة، وما يمكنش تميّزها لا فالمذاق لا فالريحة. وركزات الخارجية البريطانية على ضرورة طلب العلاج مباشرة إلا ظهرت أعراض ديال التسمم.

مواقع إعلامية عالمية، بحال Travel And Tour World، أكدو أن المغرب من الدول اللي فيها خطر حالات تسمم بالميثانول فالمناطق السياحية، ونصحو السياح يشربو غير الماركات المعروفة والمختومة، ويتفادو الشراب الرخيص أو اللي ماشي منظم.

وختم المرصد بالدعوة لاعتماد وقاية فعالة وشفافية كاملة، وتحمل المسؤولية الجماعية بين الدولة والمهنيين والمجتمع المدني باش يوقفو هاد الظاهرة ويحميّو صحة الناس وصورة البلاد.