كود كازا//
واحد الدري صغير عمرو يكون مفايتش 10 سنين، ولى بوغطاط ديال عدد من المواطنين فكازا، هاد البرهوش اللي الناس بداو يسمّيوه أخطر شفار صغير، دار لحد الآن 31 عملية سرقة موثقة بكاميرات المراقبة.
آخر ضحية، رقم 31, كانت سرقة دراجة من داخل إقامة، والعملية كلها مصورة بالفيديو، وكتأكد مرة أخرى الخطورة الكبيرة ديال هاد الطفل الصغير اللي عندو ذكاء غير عادي فتنفيذ السرقات والهروب قبل ما يتشاف. الدري اختصاصي فسرقة البيكالات والتروتينات، وحتى لدابا ممعروفش واش غير بوحدو ولا موراها شي حد كينسق معاه.
الغريب فالقصة ماشي غير حجم الجرائم، ولكن السن الصغير ديالو اللي كيزيد يخوف أي واحد يسمع بالقصة. كل عملية كتزيد تسائل المجتمع على العوامل الاجتماعية والعائلية اللي كتخلي طفل يوصل لهاد المستوى من الإجرام، وكيطرح تساؤل كبير على كيفاش نحميو الأطفال والضحايا فالوقت نفسه.
