كود – كازا //
اليوم 19 دجنبر 2025، فرنسا وإسبانيا والمغرب علنو على انطلاق برنامج “وافيرة 2”، بدعم من الاتحاد الأوروبي ومنظمة العمل الدولية، واللي الهدف ديالو يعاون 3000 عامل موسمي مغربي كيخدمو فالفلاحة ففرنسا وإسبانيا. هاد البرنامج جا مكمل لوافيرة الأولى اللي نجحات، وباغي يخلي الهجرة الموسمية منظمة، آمنة، ومفيدة الخدامة وحتى الباطرونات.
برنامج “وافيرة 2” مْول بـ95 فالمية من الاتحاد الأوروبي، فإطار شراكة ديال الهجرة، وبميزانية كتفوت 5.23 مليون أورو، وغادي يبقى خدام 40 شهر حتى نونبر 2028. هاد الدعم كيبين باللي العمال الموسميين المغاربة ولاّو مهمّين بزاف فالفلاحة الأوروبية، خصوصا ففرنسا اللي كتستقبل كل عام ما بين 15 ألف و17 ألف عامل موسمي مغربي.
البرنامج كيركز على مرافقة العمال قبل ما يسافرو، ووقت ما يكونو خدامين فأوروبا، وحتى منين يرجعو للمغرب. كاين تكوين فمشاريع صغار، فالتصرف فالفلوس، وكيفاش الواحد يطلق نشاط يجيب بيه الدخل ،3000 خدام غادي يستافدو من التوجيه والمواكبة، ومنهم 300 واحد غادي ياخدو دعم مالي مباشر باش يطلقو مشاريع فالمناطق ديالهم.
وبالنسبة للمشغلين، خصوصا ففرنسا، هاد البرنامج غادي يعاونهم يحتافظو بالعمال اللي موالفين بهم، وهاد الشي مهم بزاف باش تبقى الفلاحة مستقرة وما يكونش خصاص فاليد العاملة. المكتب الفرنسي ديال الهجرة والاندماج غادي يكون عندو دور كبير فتنظيم هاد الخدمة، وهاد الشي كيقوي التعاون بين أوروبا والمغرب وكيشجع هجرة منظمة وآمنة.
موضوعات أخرى
الاعتداءات الايرانية على دول الخليج. الجامعة العربية طلبات اجتماع طارئ
جمعية ”فريبا إحسان“ فمدريد عطات جائزة كلارا كامبوامور لگاع العيالات الإيرانيات لي حيدو الحجاب زكارة فالنظام
