كود – كازا //

حدث فالدخول التلفزيوني فبلادنا. برنامج “لنعبر “FBM الشهير اللي كيعدو ويقدمو بلال مرميد على “ميدي 1 تيفي” رجع. برنامج كان ناجح هاد الموسم الجديد رجع.

فالحلقة الأولى ديال هاد العودة كان الضيف هو الرابور المشهور عمر السهيلي، المعروف فنيا بـ«ديزي دروس”. حلقة مزيانة من برنامج ما عندناش فقنواتنا المغربية. هدر فيه على العلاقة ديالو بالسياسة والشأن العام، وكيفاش تبدلات النظرة ديالو للممارسة السياسية مع الوقت.

الفنان المغربي قال، فكلامو مع الإعلامي بلال مرميد، إن الموقف ديالو من السياسة ما بقاش هو اللي كان عليه من قبل،مني كان كيشوف السياسة بحال واحد «المسرحية» اللي المواطن فيها ما عندوش تأثير حقيقي، قبل ما يتبدل هاد التصور ويولي كيشوف أن المشاركة ممكنة، وأن المواطن يقدر يكون عندو دور ويدافع على المصالح ديالو.

ديزي دروس قال ملي المواطن كيقرر يبعد وما يبقاش يشارك فالحياة السياسية، راه كيخلي المساحة للآخرين باش هما اللي يقررو، وهما اللي يساهمو فصناعة المستقبل.

هاد الفكرة ربطها ديزي دروس حتى بالدور ديال الفنان، بحيث كيعتبر أن الفنان ماشي منفصل على المجتمع ديالو، والأعمال اللي كيقدم والمواقف اللي كيتخذ ماشي بالضرورة منفصلة على الوعي ديالو بالواقع والقضايا اللي كيدوز منها المجتمع.

وقال بلي الفنان ما خاصوش يبقى غير فموقع المتفرج اللي كينتقد من بعيد، حيث هو حتى هو جزء من هاد المجتمع، وبالتالي عندو مسؤولية، ولو كانت مختلفة، فالتفاعل مع القضايا اللي كتهم الناس.

أما فموضوع الانتخابات، فديزي دروس شدد على أن الفنانين ماشي كاملين عندهم نفس الاختيارات ولا نفس الطريقة فالتعبير. كاين اللي كيدخل فالنقاش السياسي والاجتماعي، وكاين اللي كيفضل يبقى بعيد على هاد الملفات.

وبالنسبة ليه، حتى اختيار الابتعاد كيعطي فكرة على الطريقة اللي كيشوف بها الفنان محيطو، وعلى درجة الاهتمام ديالو بالقضايا العامة اللي كتدور فالمجتمع.