كود سبور//

دارو ريال مدريد الإسباني حفل تكريم للطفل المغربي عبد الرحيم واحد من ضحايا زلزال الحوز اللي ضرب عام 2023، وتسبب فموت الألاف د المغاربة فجبال الحوز وسوس.

اليوم السبت فتيران سانتياگو برنابيو وقبل ماتش ريال مدريد واسبانيول ضمن منافسات بطولة الصبليون، دارو الريال استقبال وتكريم لعبد الرحيم، اللي هبط سلم على كيليان مبابي ونجوم الفريق، وضرب السونطر ديال بداية الماتش بين ريال مدريد واسبانيول وسط تصفيقات الجماهير فالتيران.

عبد الرحيم ولد الحوز، كانو ماتو له وليديه وعا وعائلتو الصغيرة فالزلزال اللي ضرب المنطقة عام 2023، وبان فواحد المراسلة ديال قناة العربية وهو كايعاود على المصيبة اللي صابتو، وكان لابس توني ريال مدريد، وهذا الشي خلى مسؤولين الفريق الاسباني يتحركو ويبداو في الإجراءات القانونية باش يتبناوه عندهم فلاكاديمية وهذا الشي كان خاصو شويا ديال الوقت خصوصا وانه طفل قاصر ويالاه عندو 16 عام.