كود ـ بني ملال//
عرفات جلسة مناقشة مشروع الميزانية الفرعية لوزارة الفلاحية، بمجلس النواب، اليوم الثلاثاء، نقاش جديد على مشكل الحلوف البري، اللي ولى كيدير خسائر كبيرة فالفلاحة وكيهدد الساكنة فعدد من المناطق الجبلية والقروية.
فهاد السياق، طرح واحد البرلماني على وزير الفلاحة مقترح غريب فالمظهر، ولكن منطقي فالمضمون، كيقول فيه باللي خاص المغرب يبدّل النظرة تجاه الحلوف البري، وتدار عليه استراتيجية وطنية شاملة باش يتحوّل من خطر طبيعي إلى فرصة اقتصادية مربحة.
البرلماني وضّح أن بزاف ديال الدول فإفريقيا وأوروبا كيديرو مشاريع ديال تربية الحلوف البري تحت المراقبة البيطرية، وكيصدروا اللحم ديالو للأسواق العالمية بثمن طالع، وقال: “حنا عندنا مورد طبيعي كيتلف الفلاحة وكيخوف الساكنة، ولكن يقدر يتحوّل لثروة وطنية إلا خدمنا عليه بعقلية جديدة.”
وطالب المسؤول الحكومي باش يتدار إطار قانوني يسمح بالصيد المنظّم، وتكون تربية الحلوف البري فمزارع مراقَبة، مع ضمان الشروط الصحية والبيئية، باش يمكن تصديرو للخارج بطريقة قانونية وآمنة.
وختم البرلماني مداخلتو قائلاً إن المشكل ما بقاش غير بيئي، ولكن اقتصادي حتى هو، وأن الوقت جا باش المغرب يستافد من هاد الحيوان اللي كيتباع برا بأثمان مرتفعة، عوض ما يبقى مصدر خوف وتخريب للفلاحة المحلية.
