كود سبتة////

علمت جريدة كود الإلكترونية أن برلماني سابق، واللي سبق ليه كان رئيس واحد الجماعة تابعة لإقليم النواصر، لقا راسو فموقف محرج بعدما تسدات الحدود فوجهه بسبب الخروقات والفساد المالي اللي كان متابع بيه فالفترة اللي كان فيها الآمر الناهي فالجماعة.

المعني بالأمر ما استسلمش، وحاول يلقى مخرج، بحيث توسل لخدمات واحد المستثمر معروف فالنواصر ، متخصص فبيع الرخام ومواد البناء بالجملة، باش يعاونو يهرب للضفة الأخرى من المتوسط.

غير أن رجل الأعمال الوسيط ما قدرش يدير هاد الخدمة بوحدو، وحاول يستنجد بأحد المسؤولين المغاربة المترددين على سبتة بشكل دائم . هاد الأخير واجهو بالحقيقة وقال ليه: “المغامرة خطيرة وغادي تسالي بالاعتقال ديال البرلماني السابق، حيث القرار ديال إغلاق الحدود فحقو باقي ساري، وبمجرد ما يحاول يدوز من باب سبتة غادي يتشد”.

وبهاد الشكل، بقات محاولة الهروب مجرد وهم، والبرلماني السابق لقا راسو محاصر بلا مخرج، بعدما كان البارح الآمر الناهي واليوم محاصر بالمتابعات.