الرئيسية > آراء > برلمانية عندها صلاحية تصوت على ميزانية الدولة ومعندهاش الحق تشهد على وثيقة في المقاطعة وماقادراش حتى توقف وسط القبة وتغوت واك واك اعباد الله آش هاد الحگرة واش لمرة ماشي بنادم
31/08/2021 16:00 آراء

برلمانية عندها صلاحية تصوت على ميزانية الدولة ومعندهاش الحق تشهد على وثيقة في المقاطعة وماقادراش حتى توقف وسط القبة وتغوت واك واك اعباد الله آش هاد الحگرة واش لمرة ماشي بنادم

برلمانية عندها صلاحية تصوت على ميزانية الدولة ومعندهاش الحق تشهد على وثيقة في المقاطعة وماقادراش حتى توقف وسط القبة وتغوت واك واك اعباد الله آش هاد الحگرة واش لمرة ماشي بنادم

محمد سقراط – كود///

دابا گاع هاد العيالات لي مرشحين في الانتخابات وغادي يوليو حزء من الهيئة التشريعية ديال البلاد، وكيقتارحو القوانين ويصوتوا عليهم، وكاين لي غادي يوليو وزيرات على رأس جماعات، وگاع هاد العيالات ديال المغرب القاريات والأميات ومن گاع الطبقات الاجتماعية نهار تحتاج شي وحدة فيهم تشهد غير في المقاطعة على شهادة العزوبية شهادتها غير مقبولة حيت مرة، بينما شهادة أي واحد كيشم السيليسيون تحت الحيط دايزة ومقبولة، تخايل أنه لحد الآن المغرب باقي النص ديال الساكنة البالغة ممنوع بالقانون من أنه يشهد عند المقاطعة، وبلا حتى شي سبب مقوع أو واضح من غير هذا ما وجدنا عليه آبائنا ولكن حنا ماغاديش نغيروه حيت خدام لينا.

وتخايل معايا أن المغرب حاليا أستاذة خدمات بحالها بحال الراجل حياتها كاملة وماتت ماشي من حق ولادها يشدو التقاعد ديالها على عكس الراجل لي كيخلي تقاعدو لمرتو وولادو، بحال الى خدمة العيالات غير خضرة فوق طعام وبأن الراجل لي من الواجب عليه يعيل مرتو وولادو، أما المرة حتى الى خدمات فراه غير واجب عليها تعيل راجلها وولادها أو تخلي ليهم باش يعيشو إلى ماتت، واخا واها كتخلص الواجبات والاقتطاعات بحالها بحال الراجل،  وفي اللخر ولادها يبقاو بلا تقاعد مهم، وبزاف ديال الأمهات لي كانو هوما لي خدامات على ديورهم ويصرفو على ولادهم وكتموت الام وكيتشردو الوليدات، بينما كون كانت راجل كانت غادي تخلي التقاعد ديالها لولادها، هادي راها حگرة واضحة وصريحة.

برلمانية عندها صلاحية تصوت على ميزانية الدولة ومعندهاش الحق تشهد على وثيقة في المقاطعة وماقادراش حتى تناضل ضد هاد التمييز الواضح، كيفاش غادي يفيدو الشعب وهوما مافادوش حتى راسهم ولحد الان كاين قوانين اقصائية للمرأة موروثة على حقبة كانت المرة فيها معندها حتى شي حق من غير انها تخدم راجلها، وموظفة معيلة لأسرتها وممنحقهاش تخلي التقاعد ديالها لولادها، ومع ذلك عمر شي وحدة وقفات في القبة وقالت  واك واك أعباد الله آش هاد الحگرة واش لمرة ماشي بنادم.

موضوعات أخرى

19/09/2021 13:30

الإبراهيمي كيضم صوتو للمغاربة لي عياتهم احترازات كورونا المشددة: جا وقت رفع القيود.. هادشي كيفقدنا بعضا من مصداقيتنا ويطعن فمقاربتنا العلمية