كود الرباط//

شعلت كلاشات هاد العشية فلجنة التعليم والثقافة أثناء مناقشة مشروع ميزانية التعليم العالي للي ترأسها العياشي الفرفاري بلاصت رئيسها المتغيب لظروف خاصة، بحيث تسببت طريقة تسييره وتهجمه على برلمانيات في جدل وبوليميك.

البرلمانية ريم شباط عطات للفرفاري علاش يدور حيث مخلاهاش تكمل هضرتها حول خرق رئيس الجلسة للنظام الداخلي، قبل قليل بالقاعة 5 بمجلس النواب، وحاول يقاطعها بطريقة مهينة وهي مسكتاتش ليه، وقالت ليه متقوليش عافاك والقانون مافيهش عافاك وغانقريك القانون.

البرلمانية الاتحادية سلوى دمناتي تدخلت وخاطبت رئيس اللجنة :”نتا مكتهضرش باحترام مع النائبات.. صافا پا.

ريم شباط خرجات السم لي فيها وقالت ليه: “متكونش اسم على مسمى” في إشارة إلى الفرفار زعما كيفرفر.

هادشي فمناقشة مشروع ميزانية التعليم العالي، بحضور الوزير الجديد عز الدين ميداوي لي عرفات نقاش سياسي ضعيف بزاف.