گود سبور//

ضاع لقب كاس الكونفدرالية الأفريقية من نهضة بركان، بعدما خسرو اليوم الاحد مع الزمالك المصري فتيران القاهرة الدولي، فروتور الفينال للي كان صعيب بزاف خصوصا من ناحية الصهد اللي قاصح هاد الايام فالقاهرة.

وسالا الماتش بين نهضة بركان والزمالك المصري بنتيجة واحد لزيرو لمصلحة الفريق المصري، واللي ماركاه اللاعب ديالهم زيرو فالدقيقة 23، ونهضة بركان حاولو يرجعو فالماتش سوا فالوقت اللي كان بقي من الشوط الأول او فالشوط الثاني، وكانوا قراب فشحال من مرة ولكن التسرع وقلة التركيز خلاهم يضيعو فرص كان ممكن يماركيو منها التعادل، مع العلم أن التحكيم كان مثير للجدل فهاد الماتش بسبب القرار ديال الحكم السنغالي عيسى سيسي، مع العلم ان لاعب نهضة بركان حمزة المساوي خدا الحمرا فاللحظات الأخيرة من الماتش.

نتيجة ماتش روتور فينال كأس الكونفدرالية عطات اللقب لفريق الزمالك المصري، حيث الهدف اللي ماركا فالمغرب فماتش اللي سالا بنتيجة 2 لواحد لمصلحة نهضة بركان كان عندو دور مهم ومنح الامتياز للفريق المصري بفضل التسجيل خارج الميدان، وبالتالي الزمالك ربحو هاد المسابقة للمرة الثالثة فالتاريخ ديالو وعادل رقم الرجاء الرياضي كأكثر فريق ربح هاد البطولة، وهو الإنجاز اللي كانو باغيين يحققوه نهضة بركان ولكن ما قدروش.