گود سبور//

وصل الحال بأندية عندها تاريخ بحال الرجاء والوداد الرياضيين والجيش الملكي، يوليو جمهورهم مناگر على شكون الهداف د البطولة الاحترافية للموسم الرياضي 2024-2025، من الفرق بثلاثة برصيد ضعيف بزاف، بعدما فشلو ينافسو نهضة بركان اللي داو لقب البطولة بكري.

وتعادل كل من الحسين رحيمي مهاجم الرجا ومحمد رايحي مهاجم الوداد ويوسف الفحلي مهاجم الجيش الملكي فعدد الأهداف بـ11 هدف لكل لاعب منهم، تصدرو بها ترتيب الهدافين ديال البطولة الاحترافية، ونايضة بين الرجاويين والوداديين والعسكريين على شكون الهداف، مع العلم أن الحسين رحيمي الأهداف اللي ماركاها ما فيها حتى بينالتي، عكس الودادي محمد رايحي اللي ماركا 4 بينالتيات، ويوسف الفحلي اللي سجل هدف واحد.

المصيبة أن الرجاويين والوداديين وحتى مشجعي الجيش الملكي، فبلاصة ما يركزو على الهفوات اللي خلات فرقهم يخسرو لقب البطولة الاحترافية، باركين مضاربين على مواقع التواصل الاجتماعي على شكون هداف البطولة، وكون غير كانو هاد اللاعبين ديالهم ماركين شي سكور يحمر الوجه، راه حشومة هداف البطولة وكايلعب مع أكبر الأندية المغربية بحال الرجا والوداد وليفار يكون عندو 11 هدف.