كود ـ برشيد//

مدينة برشيد كتشهد هاد الأيام حالة ترقب كبيرة، بعدما تم إدراج ملفات العزل ديال رئيس جماعة برشيد وعدد من الأعضاء فالمداولة، وهاد الشي على خلفية تقارير تفتيش كانت رصدات اختلالات فالتسيير ديال الشأن المحلي.

المحكمة الإدارية غادي تعقد جلسة حاسمة نهار 19 نونبر 2025، واللي كيتنتظر منها تصدر القرار النهائي فهاد الملفات اللي شغلات الرأي العام المحلي والسياسي فالمدينة.

المصادر كتأكد أن هاد الملفات جات بعد قرار عامل إقليم برشيد اللي كان سبق وأصدر توقيف وإحالة المعنيين بالأمر على القضاء الإداري، بعد تقرير دارتو المفتشية العامة ديال وزارة الداخلية، وتبين وجود تجاوزات مرتبطة بطريقة تدبير بعض الملفات داخل الجماعة.

الأنظار دابا كلها متجهة لهاد الجلسة، اللي ممكن تغير بزاف فالمشهد السياسي فبرشيد، خصوصا إلى تم التأشير على قرارات عزل الرئيس طارق القادري وبعض نوابه وكذلك بعض المستشارين بالمجلس ديال عاصمة ولاد احريز، الأمر اللي غادي يفتح الباب قدام مرحلة جديدة فحياة المجلس الجماعي.

الشارع البرشيدي كيتابع الملف عن قرب، وكاين انتظار كبير باش يعرفو شنو غادي يكون المصير ديال الرئيس طارق القادري واللي معاه، وبعض الأعضاء فهاد القضية اللي ولات حديث العام والخاص فالمدينة. إضافة إلى الحديث عن حزمة أخرى ديال المستشارين الجماعيين وعددهم 6 كا يروج أنهم غادين يلقاو نفس المصير.