كود – الرباط //

البرج لي تسما بسمية سيدنا واللي دشنو مؤخراً ولي العهد الأمير مولاي الحسن، ولى معلمة كبيرة كطل على واد بورگراگ وعلى مدينة الرباط وسلا، وحتى على المغرب والقارة الإفريقية.

البرج كيوصل العلو ديالو لـ250 متر و كيتعتبر أعلى برج فالمغرب وكيمثل حلم ديال عثمان بنجلون، رئيس مجموعة O Capital Group، كيف ما هو تحفة حضارية كتنسجم مع الرؤية ديال سيدنا .

الخدمة ديال بناء برج محمد السادس بدات فـ1 نونبر 2018، واليوم تسالات الأشغال ديالو من بعد 8 سنين ديال الخدمة المتواصلة لي ماوقفاتش، بفضل تعاون عدد كبير من الكفاءات والخبراء اللي خدمو بكل احترافية.

ومن 2014 كلّف عثمان بنجلون، بصفتو مول المشروع المهندس الإسباني رافائيل دي لاهوز، بمشاركة المغربي حكيم بنجلون، باش يصممو البرج, وكان الهدف أن الشكل ديالو يجي بحال شي صاروخ واقف فوق منصة الإطلاق كإشارة لانطلاقة المغرب فاتجاه المستقبل.

البرج يمكن يتشاف من مسافة 60 كيلومتر، وكيعطي إطلالات بانورامية على المحيط الأطلسي ،البرج فيه 55 إيطاج، وغادي على مساحة إجمالية ديال 102.800 متر مربع ، وفيه عدد من المرافق كتخليه عنوان للعضامة ومركز حضري متعدد الاستعمالات بمكاتب مجهزة و متطورة، شقق كلاص، أوطيل مصنف بعلامة Waldorf Astoria و مرصد وفضاءات للعرض، وفالطابق الأرضي كاينين ريسطورات وقاعة استقبال وقاعة مؤتمرات ومعرض فني، عاد باركينغ ديال الطموبيلات ، وكاين حتى ممر مائي كيدي نيشان لواد بو رقراق.

الهندسة ديال البرج فيها تقنية Shell & Core لي كتستعمل فالمشاريع الكبرى، واللي كتجمع الوظائف التقنية كاملة وهاد الشي كيوفر فالواجهة الشمالية التيساع والضو كيف ما تغطات بزاج كيخلي البرج يبان تحفة فنية خفيفة ومبتكرة.

أما فالواجهة الجنوبية، فكاينة طبقة مضوبلة مساحتها 3900 متر مربع من الألواح الشمسية ، اللي كتلتقط الطاقة باش تزود البرج بالضو، وهكا كيجمع البرج بين الحماية الحرارية وإنتاج الطاقة الخضراء فتناغم بين الجمالية والأداء، الشي لي خلاه ياخد شهادة LEED الذهبية وشهادة HQE للجودة البيئية العالية.

فالقمة ديال البرج كاينة قبة بتصميم كيشبه للصاروخ، وفيها المرصد فليطاج الخمسين ،ومن العرض الرقمي، يقدر الزائر يكتشف المعالم التراثية على جناب واد بو رقراق.

وفليطاج 51 كاينة كاين المعرض الدايم “السماء كتتكلم بالعربية”، اللي كيحتفل بالعلوم والمعارف الفلكية فالعصر الأندلسي.

فجميع مراحل المشروع، عثمان بنجلون بغا يدمج بين المهارات المغربية والخبرة الدولية، وبين الصناعة التقليدية المغربية والخطوط المعمارية الجديدة ، داكشي علاش خدمو فيه معلمين تقليديين ومصممين عالميين تحت الإشراف الفني للمهندس المعماري الفرنسي بيير-إيف روشون، باش يحطو تجهيزات خاصة وتحف فنية مميزة.

الفضاءات فالبرج فيها 7000 عمل فني ديال 314 فنان ومبدع مغربي ودولي كيف ما فيه منحوتات عملاقة، جداريات، وزخارف خطية من الگبس المنقوش.

الحاصول البرج كيوصل رسالة قوية للعالم ديال انه المغرب كيتقدم اقتصادياً واجتماعياً وثقافياً، وكيصيفط إشارة واضحة للقارة الإفريقية وللعالم كامل أن المملكة جاية بجهد بالخدمة والإستحقاق.