كود كازا ///

لخميس 22 دجنبر 2022 فاوطيل بيضاوي كان حدث مهم فالصحافة المغربية خاصة الورقية. “لاڤي ايكو” الاسم المعروف فالصحافة تحولات لمجلة. تحدي كبير بزاف فعالم الصحافة اللي كيعيش ازمة ورا ازمة. كلشي كيهرب من الورقي. 

لكن “لاڤي ايكو” عندها تاريخ. بدا هادي 100 عام. كان اسمها فالاستعمار « Un petit casablancais وكانت كتواكب مغرب ديك الحقبة اقتصاديا. بعد الاستقلال ولا اسمها “لاڤي ايكو”. جورنال بالفرنسية مختص فالاقتصاد. 

هاد الاسم جزء من تاريخ بلادنا. دابا خدات تحول جديد. مجلة من 68 صفحة فهاد ليام خاصك تكون مجنون بالصحافة، مؤمن بيها. مؤمن بمستقبلها. هادا هو التحدي اللي طلقاتو مجموعة “كاراكتير” وطلقو بالاخص مدير النشر الجديد للجريدة اللي هو فهد العراقي. 

صحافي قادر يرجع مجد هاد الجورنال. داز من تجارب مهمة لمجلات طبعات تاريخ المغرب الحديث بحال “لوجورنال” و”تيل كيل”٬ فهد متخصص فالشأن الاقتصادي والمالي. مسكون بالصحافة. فالسنوات الاخيرة دار تجارب فالصحافة الالكترونية ولكن ما عمرو نسى حبو الاول للورق. 

تحدي كبير قدامو دابا. تحدي قادر يربحو. عندو التجربة وعندو كصحافي كاع الامكانيات باش يربح التحدي. على مستوى المواضيع والملفات هاد الشي قادر عليه. محتاج لجيل جديد من الصحافيين يلتاحقو بالجيل اللي كاين فالمجلة اليوم باش يتبتو لكلشي باللي زمن الصحافة المكتوبة ما سالاش.

العدد الاول من هاد الفورما الجديدة لهاد الجريدة المعروفة دابا فالسوق. المهم هاد العدد مزيان بزاف للمورال. مورال الصحافة المغربية اليوم