كود كازا//

التقدم والاشتراكية طلع النيفو فهاد الدخول السياسي ودار قرار شجاع، فاش طلب من البرلماني سعيد الزايدي المدان بعام ديال السجن النافذ، وخرج هاد الأيام، (طلب منو) ميحضرش لافتتاح البرلماني لي غايترأسو الملك محمد السادس.

فهاد السلوك لي دار “البي بي إس”، فسر قيادي فهاد الحزب، بالقول لـ”كود”: “أخلاقيا واحتراما لجلالة الملك طلبنا من الزايدي ميحضرش”. منتقدا في نفس الوقت تغاضى أحزاب أخرى عن البرلمانيين المدانين بأحكام ثقيلة في ملفات الفساد المالي، والذين سيحضرون جلسة الافتتاح.

من بين البرلماني المدانين، رئيس جماعة بوزنيقة، البرلماني الاستقلالي محمد كريمين لي عندو حكم فالاستئناف فيه أربع سنوات موقوفة التنفيذ، وغرامة مالية قدرها 50 ألف درهم. هذا تاهو يحضر للافتتاح واخا متابع بتهمة تبديد أموال عمومية، إثر صرف الجماعة محروقات لفائدة مفوضية أمن بوزنيقة، مع أداء مصاريف سفر أحد نواب الرئيس إلى إسبانيا، في مهمة خاصة بالجماعة.

البرلماني الثرثار مول “هشة مشة” تاهو مدان فالاستثناف، بحيث قضّت محكمة الاستئناف، في شهر يوليوز 2022، بتأييد الحكم الابتدائي الصادر في حق البرلماني عبد النبي عيدودي عن حزب الحركة الشعبية، بـ”سنتين موقوفة التنفيذ”.

صاحب مقولة “كش هش” توبع في قسم الجرائم المالية في المحكمة المذكورة، بتهمة “تبديد أموال عامة” عندما كان على رأس جماعة الحوافات بسيدي قاسم.

وكانت مصادر “كود” قالت بأن البرلماني سعيد الزايدي، عن فريق التقدم والاشتراكية بمجلس النواب، مغاديش يحضر لافتتاح الدورة التشريعية يوم الجمعة 14 أكتوبر، وللي غادي يترأسها الملك محمد السادس.

وحسب مصدر “كود” “البي البي إس” اتفق مع الزايدي باش ميحضرش للافتتاح، خصوصا وأنه دار الجدل فاش خرج من الحبس الأسبوع لي فات، ومباشرة بعد خروجه من السجن مشى للبرلمان يحضر فاجتماع إحدى اللجان.

الزايدي دبا غالبا غايمشي يدير شهادة طبية باش ميحضرش، وحسب معلومات “كود” كان اتفاق داخل الفريق البرلماني باش ميجيش الزايدي، ماشي حيث ممنوع قانونيا، حسب مصدر “كود”: “أخلاقيا واحتراما للملك قلنا له متجيش للبرلمان”.

وكان سعيد الزايدي، الرئيس السابق لجماعة الشراط قد غادر أسوار السجن، الأربعاء الماضي، بعد قضائه سنة حبسا بسجن عكاشة بالدار البيضاء، على خلفية اعتقاله متلبسا بتلقي رشوة مالية من مقاول عقارات.