كود كازا//

تخيل أنك تتواصل مع نجم هوليوود براد بيت، وتخيل أنه يطلب منك الفلوس باش يدير عملية على الكونصير د الكلاوي، حيت أنجلينا جولي جمدات فلوسو فالطلاق، واش تدخلك هادي للدماغ؟

هادشي اللي وقع لمرا فرانساوية. الضحية اللي عندها 53 عام واللي سميتها  «آن»، وخدامة كمصممة ديكور، قالت ان الكابوس بدا فسبتمبر 2023 فاش وصلاتها رسالة عبر «إنستگرام» من «جين إيتا بيت»، زعما الوالدة د الممثل. وقالت المحتالة لآن: « مرا بحالك هي اللي محتاج ولدي ».

ومن بعد بدا يهضر معها براد بيت المزيف كل نهار، وواخا فاللول شكات شوية، دغية قنعها انه بصح النجم المريكاني.

فداك الوقت، كانت كتمر بمرحلة صعيبة فحياتها الشخصية، وكانت علاقتها مع راجلها، رجل أعمال مليونير، كبير عليها بـ19 لعام، فحالة تدهور..

وكان كيصيفط النصاب لآن قصائد وأغاني وتصاور باستخدام الذكاء الاصطناعي، والديب فايك باش تبان بحالا بصح، صافطلها حتى هدايا خلصات عليهم فلوس صحيحة فالديوانة..

وفالنهاية، قالها راني فيا سرطان الكلاوي، ومحتاج الفلوس باش نداوا، حيت مراتو السابقة أنجلينا جولي جمّدت حساباتو وأنه ماقادرش يتصرف ففلوسو.

فالطوطال حولت آن 830 ألف اورو  باش تعاون النصاب. وبعدما شافت تصاور د براد بيت الحقيقي مع صاحبتو الجديدة، إينيس دي رامون، فالصحف بدات كتشك.

ومشات الضحية عند البوليس الفرنسي تخط شكاية، وتفتح تحقيق فالصيف د 2024. آن كاينة حاليا فالمستشفى كتلقى العلاج من الاكتئاب الشديد.