عمر المزين – كود///

بعد طول انتظار من طرف النقابات التعليمية غادي يعقد محمد سعد برادة، وزير التربية الوطنية والتعليم الأولي والرياضة، أول لقاء معهم اليوم الثلاثاء، وباين أن الرجل خدا وقت طويل باش يهضم المطالب النقابية لي فيها حريق الراس ف هاد القطاع الصعيب لي كيخدم فيه نصف عدد موظفي الدولة.

وحسب مصادر ” كود”، فإن الوزير برادة يعرف جيدا تعقيدات الحوار الاجتماعي في القطاع الخاص لأنه ينتمي إلى فئة الباطرونا، ولكن باقي خاصو يعرف قواعد اللعبة في الحوار القطاعي ديال التعليم، خصوصا وأن هذا القطاع عرف مع بنموسى أكبر أزمة ف تاريخ المغرب فاش المدارس تغلقو لمدة 4 أشهر بسبب أطول إضراب تعليمي، وهو الإضراب لي أدى إلى إعفاء مدير الموارد البشرية السابق وتم تعويضه مؤقتا بمدير أكاديمية الرباط.

وقالت مصادرنا أنه “وخا تحلات حوالي 82% من مشاكل التعليم إلى حدود الآن، فالتحدي الكبير عند الوزير الجديد هو تلبية باقي مطالب نساء ورجال التعليم، (18%) وهي الشق الأصعب بزاف.

ومن هاد المطالب، حسب مصادرنا، كاين “التعويض عن الوسط القروي، وحملة الشهادات العليا، والترقية لي غادا غير بشوية بشوية”، وهذه كلها ملفات تتطلب المرافعة القوية لدى رئيس الحكومة باش يزيد شوية في ميزانية تمويل الحوار القطاعي في التعليم، بعدما عطا الوزير فوزي لقجع كل ماقدر يعطيه في عهد بنموسى.