كود – وكالات //

صاك ديكور.. ولكن بثمن الموضة والاسم الكبير، هادي هي الفكرة اللي خرجات بها برادا لجمهور هاد السيمانة بميلانو، بعدما رجعات الصاك بياسة كتستعمل ل «صاك ديال كتاف»

فالعرض ديال مجموعة ربيع وصيف 2027، برادا قدمات واحد من أكثر الاقتراحات غريبة ، ستة العارضات بانوا بحوايج مفتوحة بشكل كبير، وقريبة فالشكل ديالها للسوتيان، ومعلق فيها  حلقات وصماطي صكان صغار بزاف، تقريباً بنفس العبار ديال مونيكة «لابوبو».

الفكرة كتجي فوسط موجة عالمية د اللي تحولات  فالعامين الأخيرين  لإكسسوار صغير عند بزاف ديال الناس.

مونيكات صغيرة ولات كتعلق ، خصوصاً «لابوبو»، اللي خذات دفعة كبيرة بعدما بانت بها ليزا، عضوة بلاك بينك، فصور نشرتها على إنستغرام عام 2024.

ومن بعد، دخلات ماركات كبيرة بحال بالينسياغا، لويفي وميو ميو على الخط، وولات حتى هي كتزين الصيكان ديالها بهاد التعليقات .

لكن برادا دارت العكس ما بقاتش المونيكة هي اللي كتعلق وإنما الصاك نفسو ولا هو لي كيتعلق.