علي الصافي كود كازا ///

عز الدين الميداوي وزير التعليم العالي خرج كيبرر تصرفو الغبي٬ ايلى ما قلناش حاجة اخرى مع زميلو٬ بللي كان فالوزارة الميراوي عبد اللطيف نهار تبادل السلط البارح الاربعاء 24 اكتوبر 2024 باش ما بغاش يسلم عليه قدام كلشي.

هاد المسؤول المغرور واخا مازال حتى ما دخلتش حتى للوزارة٬ خرج٬ عن طريق مقرب منو٬ باش يقول باللي الفيديو اللي تنشر “تم اقتطاعو لغاية فنفس يعقوب” وباللي روجوه “بعض المواقع بعض المواقع الصحفية المقربة من الوزير المنتهية ولايته “عبد اللطيف الميراوي” غير دقيق وغير صحيح”.

استحمار للمغاربة. واش هادا بصاح كان رئيس جامعة لقنيطرة اللي كيعطي هاد التبريرات. واش هادا بصاح يكون حتى رئيس لجامعة ما بالك بوزير فالحكومة. كيفاش تم اقتطاعو وكيفاش تم ترويجو من قبل مواقع مقربة من الوزير.

هادي اول مرة كنعرفو باللي الميراوي عندو مواقع مقربة. دابا باش عندك الوزارة دخل شوف وسول واش هاديك المواقع عندها دعم من الوزارة ايام الميراوي. على الاقل ايلى جبتي شي وثيقة يكون لكلامك معنى.

هاديك التبريرات للي طلقتي كتزيد يدينك. هاداك لكلام ديال “الوزير الميداوي تجمعه علاقة متميزة مع الوزير السابق عبد اللطيف الميراوي الذي صرح بذلك علانية بقاعة الاجتماعات وهما عضوين بنفس الحزب” حتى هي كذوب فكذوب. يعني بدا بتصرف غبي واستحمر لمغاربة باش طلق هاد لكذوب.

باش كملها وجملها باش قال الميداوي فاللخر “يبدو أن هناك من يحاول من خلال هذا التعيين بث ادعاءات تخدم بعض الأجندة لعرقلة مسار الرجل الشي اصبح مطالبا بخل معضلات تسبب فيها من تسبب فيها سامحه الله”. اه كتب “خل” عوض “حل” باش يقول باللي جابوه يحل مشاكل تسبب فيها الميراوي فاشارة لقضية طلبة كلية الطب.

يعتاقد هاد الميداوي باللي قرارات بحال هادي كياخدها وزير بوحدو ماشي قرارات ديال حكومة.

كلشي اللي خرجو هاد الميداوي لا شكلا =ماشي بيان رسمي ولا موقعش. غير تسريب= لا مضمون كيبشر بيخير. هاد الميداوي بداها بتصرفات كانت تكون موجبة للطرد. فين هاد الحزب ديال التراكتور علاش ساكت على تصرف غبي حقير من واحد منو ضد واحد اخر حتى هو منو.