كود – سبور//

خرج البطل المغربي السابق فرياضة الكيك بوكسينغ، بدر هاري، من الحبس فهولندا البارح الجمعة، من بعد 3 أيام على توقيفو فأمستردام، قاضي التحقيق قرر يوقف الحبس الاحتياطي ديالو، ويسمح ليه يتابع القضية وهو برا، ولكن بشروط.

هاري، اللي عندو 41 عام، كيتابع فملف فيه شبهات ديال التهديد والإكراه، وزيد عليها نشر أو كشف معطيات شخصية بلا ترخيص، السلطات الهولندية ما كشفتش على الشروط اللي فرضها القضاء عليه.

هيئة الدفاع ديال بدر هاري أكدت أن بدر هاري كينفي التهم الموجهة ليه، وقال المحامي ديالو إن الأدلة المرتبطة بأغلب الوقائع ما اعتمدهاش قاضي التحقيق فقرارو.

البوليس الهولندي كان علن نهار الثلات على توقيف هاري بسبب شبهات مرتبطة بالتهديدات والإهانات، قبل ما تتوسع لائحة الوقائع اللي كيتحقق فيها.

من بعد ما خرج من الحبس، علن بدر هاري أنه رجع لدارو وتلاقا مع العائلة ديالو، قبل ما ينشر رسالة فحسابو على إنستغرام هضر فيها على القضية.

هاري قال بلي جزء من الصداع مرتبط بنزاعات عائلية مع طليقتو، خصوصا فموضوع تربية الأطفال ديالهم.

وأكد البطل المغربي السابق أنه تعاون مع السلطات من اللول، وقال بلي واثق فالمسار القضائي وفالموقف القانوني ديالو.

وفآخر رسالتو، قال هاري إنه غادي يكون على بال فالمستقبل ملي يهضر على الأمور العائلية ديالو، كيف ما شدد على أن الأطفال ديالو باقيين هما الأولوية بالنسبة ليه.

وهكذا، غادي يكمل بدر هاري المرحلة الجاية من الملف القضائي برا الحبس، مع الالتزام بالشروط اللي حددها ليه القضاء الهولندي.