كود سبور//
قرر بدر بانون النجم السابق للرجاء الرياضي الانخراط فالنادي الأم ديالو اللي كبر فيه من البيبي حتى للسينيور ودار فيه كابيتان، فواحدة من الخطوات القليلة اللي كيديروها لاعبين كرة القدم فالمغرب.
وحط النجم الرجاوي السابق بدر بانون بشكل رسمي طلب الانخراط فالرجاء الرياضي مع الرجاويين اللي باغيين ينخرطوا فالنادي برسم الموسم الرياضي 2023-2024، بعدما كمل الإجراءات اللازمة وفق القانون الداخلي للنادي، ودابا غايتسنا الجمع العام المقبل، باش يصادقو له منخرطين النادي على الانخراط حسب قانون الرجاء الداخلي، وباش يولي بانون ثاني لاعب كيتحول إلى منخرط على الأقل فالجيل الحديث د الرجاء بعد عصام الراقي.
وكيتعتبر بدر بانون من أحسن المدافعين اللي دازو فالرجاء الرياضي خلال السنوات اللي فاتت، وفالمغرب وعلى مستوى المدافعين الممارسين فإفريقيا، ومن بعد الرجاء مشى للأهلي المصري وربح معه ألقاب وبعدها مشى لقطر القطري.
وساهم بد بانون فتتويج الرجاء الرياضي بألقاب إفريقية ومحلية، وربح كأس إفريقيا للمحليين مع المنتخب المغربي المحلي وأيضا، ساهم فالإنجاز التاريخي ديال الأسود فمونديال قطر 2022.
