احمد الطيب – كود الرباط//

أكد مصدر من داخل الاغلبية الحكومية ل”گود”، أن خرجة نزار بركة امين عام حزب الاستقلال، الأخيرة، ليست إلا محاولة يائسة من حزب الاستقلال في ممارسة لعبته المفضلة قبل بدء التسخينات والاستعدادات المبكرة لانتخابات 2026.

وحسب ذات المصدر، فإن اللعبة المفضلة لحزب الميزان عنوانها ومضمونها “ياكل مع الذيب ويبكي مع السارح”، وهادشي لي كان فالخطاب السياسي لي دار بركة بمناسبة تقديم وثيقة المطالبة بالاستقلال، فاش هجم بشكل غير مسبوق على الحكومة وقدم صورة كحلة على واقع التشغيل فالمغرب.

وأوضح ذات المصدر بلي مشكلة البطالة فالمغرب تراكم وكاينا ارقام رسمية ورقم 21.3 في المائة ماشي دقيق باش يصدر من عضو في الحكومة مطلع على الأرقام، والا كان للي خصو يحشم سياسيا فموضوع البطالة فهو حزب الاستقلال لأن كولشي كيتذكر فضيحة النجاة والضحك على احلام الالاف من الشباب المغاربة.

وافاد ذات المصدر أن بركة خرق ميثاق الاغلبية وأكد بلي مكاين لا تنسيق ولا هم يحزنون، باش لعب هاد اللعبة في زمن انتخابي محض. ولكن ماشي غريبة على هاد الحزب.

بالرجوع للتاريخ، يضيف نفس المصدر، فرته حزب الاستقلال ديما كايدير هاد القوالب مع الاحزاب لي كيشارك معهم فالحكومة، لدرجة ان هاد الحزب كيبرأ راسو من اي مسؤولية مشتركة وتضامنية كجزء من الحكومة، بعبارة اخرى راه وزير الصناعة وفشلو الكبير ماشي سبب فالبطالة وانما اخنوش هو السبب. هادي لغة الاستقلال.
وكشفت مصادر “گود” بلي الاحرار غاضب من تصريحات بركة لي شاف بأنها طعنة من الخلف من حليف قريب عكس البام.

يشار بلي بركة قطر الشمع على الاغلبية الحكومية، وبان بلي مراضيش على حصيلة الحكومة خصوصا في الجانب المتعلق بالتشغيل وهضر كذلك على الانحسار السياسي وأزمة الثقة فالمؤسسات.
دبا واش الاحرار غادي يرد ولا غادي يصفيو الحسابات مع الاستقلال ف التيران والميدان خلال انتخابات 2026؟.