هناء ابو علي كود كازا ////

نايضة فاذاعة “لوكس راديو”. الاذاعة اللي كيملكوها “آل الغالي” وكيشرف عليها عبد الصمد ابو الغالي اخ صلاح ابو الغالي كتعيش وضعية “كارثية” حسب شهادات ل”كود”. دابا التقنيون والصحافيون والاداريون مخلوعين. كلشي كيسول “فين غادي هاد الشي”.

الاذاعة اللي كان فيها هامش الحرية واسع مقارنة مع اذاعات وطنية٬ غيرات خطها التحريري حسب صحافي سابق فيها ل”كود”. “جاو عندنا واحد النهار قبل اشهر وقالو لينا “ما نبقاوش نهدرو على الشوماج ونوليو نهدرو علي خلق فرص الشغل. ما نبقاوش نهدرو علي ما هو سلبي. ما نبقاوش ننتاقدو”.

هاد التحول جا بعد وصول ابو الغالي صلاح للقيادة الثلاثية ف”البام” قبل ما يقررو تجميد عضويتو والقضية الان غادية للمحكمة.

مع هاد التحول جا تزيار الصمطة٬ يحكي كرونيكور سابق فهاد الاذاعة ل”كود”. بداو يتشكاو وفاللخر ليام اللخرة جراو على شي حد سميتو التويسي كان كيقدم “افيك او سون بارور”. حلو معاه القضية ومشى بالتراضي لشي وكالة منبوذة فالبلاد وخرجات هيئة الناشرين قبل اشهر بيان ضدها. حسب مصادر داخلية ل”كود” كانو غاديين يجريو علي هاد التويسي فاكتوبر 2021. كيتاهموه باللي كيخلط مشاريعو الخاصة بالبرنامج وكانت النقطة اللي افاضت الكأس هي تنظيمو لعشا كان فيه وزير ورجال اعمال وسماه باسم البرنامج. مصدر اخر قال ل”كود” باللي كان قليل الاحترام للضيوف. كان ضاصر واضاف “دابا يمشي يقلل احترامو على كليان هادي الوكالة اللي صورتها خايبة فالسوق ويشوف اش غادي يوقع ليه”.

وفق مصادر “كود” تم الاستغناء على عدد من لكرونيكورات اللي كانو مزيانين. عددهم 4. ظاهريا بسباب صاليرهم اللي كيتراوح ما بين 50 الف و40 الف درهم لكن فالحقيقة التحول فالخط التحريري خربق كلشي” تضيف مصادر “كود”

كما تم الاستغناء على صحافية.

وفق صحافي سابق فهاد الاذاعة فهامش الحرية كان لعب دور كبير باش تولي “لوكس راديو” على اللي عليه اليوم. طبعا قبل هاد التحولات. “مدير الاذاعة عبد الصمد ابو الغالي ما كيجيش بزاف. يونس المحرار مدير البث والبرمجة ما فيدوش. مخرج ولى مدير بث بلا تجربة بلا نيفو طالع. وحتى هو كيجي معطل. راه الاذاعة كانت مزيانة حقاش الصحافيين والصحافيات ولكرونيكورات كانت عندهم حرقة كبيرة علي صورة الاذاعة وعزيز عليهم خدمتهم.

اليوم وفق اكثر من صحافي وتقني فهاد الاذاعة “كلشي تالف”. مع ما ينشر على قضية ابو الغالي وبن الضو امبراطور الفروماج تزادت التلفة. خرجات خبار باللي الفرقة الوطنية استمعات لعبد الصمد ابو الغالي٬ فاطار تحقيقها علي قضية بيع ابو الغالي ل6 هكتارات لبن الضو وبعد ما تعطل عاود باعها لابراهيم مجاهد رئيس جهة بني ملال سابقا وحتى هو من البام. ابو الغالي كيقول باللي مظلوم فهاد الملف اللي دخل الحزب لدعم مول الفروماج وتحول لجلاد ضدو.

حتى المستعمين تالفين. كيتاصلو٬ وفق مصادر “كود”٬ كيسولو على الكرونيكورات. كيسولو علي التحول اللي وقع. الاذاعة غادية للهاوية. يمكن الحل اللي بقى هو بيعها