كود عن بوليتيكو ولوفيگارو////

أفادت صحيفة” بوليتيكو” ان ضم الوفد المرافق للرئيس الفرنسي إيمانويل ماكرون خلال زيارته للمغرب، الكوميدي من أصل مغربي ياسين بلعطار، خلق جدل ففرنسا بسبب الحوايج اللي لبس وهو غيتلاقا الملك محمد السادس.

واوضحت الصحيفة ان الكوميدي بالعطار تعرض لانتقاد كبير ففرنسا والناس ضحكات عليه على مواقع التواصل الاجتماعي، مضيفا انه اصلا كان هدف لليمين المتطرف ففرنسا اللي كيتهموه بالإرتباط والقرب من تيار الإسلام السياسي،و التساهل المفترض مع معاداة السامية…) بالإضافة إلى إدانته بتهمة التهديد بالقتل.

وأشارت اليومية أنه وبحسب مصدر مقرب من القصر، طلبو من الكوميدي بالعطار يبدل حوايجو باش يتعشاو ولبس حوايج رياضية مالايقينيش بحدث فحال هذاك بالإضافة لانه مور العشا مشا لبيتو وخلاهم…

ومن جهة أخرى أشارت الصحيفة أن أحد المستشارين فالمغرب، صرح ان المعاملة الاعلامية الفرنسية مكانتش كيف بغاو، لأن المغاربة كانو كيتسناو يتهضر ويتركز على التقدم اللي حقق المغرب، وكأس العالم لكرة القدم 2030، والبنية التحتية، وولي العهد…الا انهم نساو هادشي كامل وركزو فالعطار وشنو لابس.

وبحسب يومية لوفيگارو، فإن ياسين بلعطار مكانش فالقائمة الأولى للوفد الرسمي اللي علن عليه القصر. تمت إضافة اسمه وأحد عشر آخرين ونشرهم مساء الاثنين. وكان فالوفد 122 في المجموع. وافق إيمانويل ماكرون على الدعوة شخصيًا،» بحسب مصدر مطلع. كما أشارت الصحيفة أن الممثل الكوميدي الفرنسي المغربي، البالغ من العمر 42 عاما، والمتحدر من مدينة إيفلين، كان باغي يجي مع الوفد بأي طريقة وجرب جميع الطرق لا من الجانب المغربي ولا الجانب الفرنسي مضيفة أنه قدر فالتالي يجي نظرا لعلاقتو الوطيدة مع ايمانويل ماكرون.

وأوضحت الجريدة أن الهدف من هادشي كامل اللي دار هو انه بغا ياخد بلاصة جمال دبوز فالعلاقات الثنائية لاسيما وأن الدبوز خسرات علاقتو مع المغاربة وبغا يلعب دور السفير فالمغرب ويربح ثقة المغاربة والمسؤولين وبالتالي يجي للمغرب ويدير مشاريع واستثمارات.

بلعطار كان خرج فتصريح مع “بي ام تيفي” باللي هاد القضية روجها اليمين المتطرف وباللي فرحان بزاف يجي لبلادو وبلاد جدادو وباللي خاص الهدرة على العلاقات الثنائية وعلى ما حققه المغرب ماشي على امور تافهة