كود الرباط//

المكتب السياسي لحزب الأصالة والمعاصرة لي اجتمع لبارح 25 دجنبر 2024، عبر على الإشادة ديالو لمضامين ومخرجات جلسة العمل لي ترأسها الملك محمد السادس حول مراجعة مدونة الأسرة.

البام أكد على أن  التوصيات والخلاصات لي خرجات من جلسة العمل لي ترأسها سيدنا “جد متقدمة” وكتعكس رؤية عميقة للتطوير.

وطالب البام من الحكومة بالتحرك السريع وبلورة مشروع قانون كيواكب هاد التوجيهات الجديدة، وكيجاوب على التحديات الحقيقية لي عايشينها الأسر المغربية.

البام وجه رسالة للشركاء فالأغلبية، ودعاهم لاجتماع عاجل باش يتفاهمو على أنجع الطرق لتنزيل هاد الإصلاحات.

البام بان متحمس فنقاش المدونة، وحضر عبد اللطيف وهبي وزير العدل  للمكتب السياسي واخا قليل فاش كيحضر، وهو لي دار عرض حول مضامين إصلاح المدونة.