كود سبور//

ربح لاعب مغربي آخر الشومبيونزليگ هذا الموسم، وكيتعلق الأمر بأسامة الإدريسي نجم باتشوكا المكسيكي، اللي توج بدوري أبطال الكونكاكاف أمام أنظار وتشجيع عبد الفتاح اللبار سفير المغرب فالمكسيك.

وقدرو باتشوكا المكسيكي ياخدو لقب دوري أبطال الكونكاكاف، بعدما ربحو الليلة الماضية فريق كولومبوس كرو المريكاني بنتيجة 3 لزيرو، ماركا منها اللاعب المغربي أسامة الإدريسي الهدف الثاني فالدقيقة 32.

وعرف ماتش الفينال بين باتشوكا المكسيكي وكولومبوس كرو المريكاني، حضور سفير المغرب فالمكسيك عبد الفتاح اللبار، اللي كان حاضر فالتيران باش يشجع المحترف المغربي فالمكسيك أسامة الإدريسي، وملي سالا الماتش هبط للتيران وتصور مع العلم المغربي ومع اللاعب واحتفل معه.

وبهذا كيولي أسامة الإدريسي أول لاعب مغربي كيربح دوري أبطال كونكاكاف، ورفع عدد اللاعبين المغاربة المتوجين بالشومبيونزليگ هذا الموسم إلى 4 لاعبين فقارات مختلفة، الإدريسي فالكونككاف (أمريكا الشمالية)، وابراهيم دياز فأوروبا، وسفيان رحيمي فآسيا، ورضا سليم فإفريقيا.