كود ـ وكالات //

واحد البحث علمي خرج كيقول بللي ماشي غا طفرة وحدة هي اللي بدلات الإنسان وخلاّتو يبان مختالف، ولكن تراكم ديال تغيرات صغار فـ ADN من ملايين السنين، ولكن 3 جينات كبار لعبو دور مهم فهاد التحول: FOXP2  وHAR1 وSRGAP2C، واللي كيعتابروهم بعض الباحثين “الثلاثية الذهبية” ديال تطور الإنسان.

أول جين هوFOXP2، المعروف بـ”جين اللغة” عند البشر فيه جوج تغييرات صغار مقارنة مع القردة، ولكن عطاو نتيجة كبيرة: تحكّم أحسن فعضلات الفم واللسان، وقدرة متطورة على معالجة الأصوات وتركيب الجمل، حتى النياندرتال كان عندهم نفس النسخة تقريبًا، وهاد الشي كيشير أنهم ربما كانو كيهضرو.

ثاني عنصر هوHAR1، وهي منطقة فـ ADN تبدلات بسرعة كبيرة عند الإنسان مقارنة مع باقي الكائنات، هاد التغيرات وقعات فمرحلة تكوين الجنين، خصوصًا فالقشرة الدماغية، اللي مسؤولة على التفكير والتحليل والذاكرة. هاد الطفرة جات مع تضخم وتعقيد دماغ الإنسان.

أما الجين الثالث SRGAP2C، فجا نتيجة “نسخة” من جين آخر، ولكن خدم بطريقة معاكسة، هاد الشي خلا الخلايا العصبية كتبقى مدة طويلة وهي كتتطور، وخلا تكوين روابط كثيرة فالمخ، النتيجة كانت دماغ ناشط وقابل للتعلم بشكل كبير، وهو سرّ الذكاء البشري.