گود سبور//

كايعيشو عدد اللاعبين الدوليين المغاربة، مشكل كبير فالانتقالات الصيفية الحالية، ومازال ما قدروش يمشيو لاندية اخرى باش يطلعو مستواهم او على الاقل يلعبو دقايق كثر.

آخر واحد هو نايف أگرد اللي مشى دوز التيست ميديكال عند ريال سوسيداد الإسباني، باش يلعب معهم بريطي من أولمبيك مارسيليا الفرنسي، مع إمكانية شراء العقد ديالو بشكل نهائي، وحسب موقع “فوت ميركاتو الفرنسي”، فاللاعب المغربي دوز التيست ميديكال بنجاح ولكن ملي دار اجتماع مع مدرب ريال سوسيداد قرر التراجع على توقيع العقد والانتقال للفريق الإسباني.

اما ايوب بوعدي راه ملي سالا كاس العالم والمعلومات فوسائل الإعلام الاروبية كاتقول انه غادي يمشي من ليل الفرنسي لمانشستر سيتي النگليزي، لدرجة ان الاعلام الاوروبي هضر على صفقة كايوصل المبلغ ديالها لـ130 اورو، باغيين مان سيتي يحطوه مقابل التوقيع مع اللاعب المغربي الشاب، ومازال هاد الصفقة ما كملاتش، واليوم الجمعة صابحين وسائل الإعلام الاوروبية كايهضرو على رجوع الاسباني رودري لمانشستر سيتي بعدما كمل الكونجي، وهو اللاعب اللي كان محتمل يمشي للبارصا او ريال مدريد، ومان سيتي يعوضوه بأيوب بوعدي، هذا الأخير اللي مازال حتى لدابا مع ليل الفرنسي وما معروفش واش الانتقال ديالو لمانشستر سيتي غادي يكمل، ولا غادي يكون حتى هو بحالو بحال عدد من اللاعبين المغاربة، اللي كل ميركاتو كاتروج الهضرا انهم غادي يمشيو لفراقي كبيرة، ولكن ما كايكون والو وكايبقاو غير مع فراقيهم.

وبخصوص عز الدين اوناحي فاللاعب مازال مع جيرونا الاسباني اللي غادي يلعبو الموسم الجاي فالقسم الثاني من بطولة الصبليون، وبعدما راجت الأيام اللي فاتت اخبار على وسائل الإعلام الإسبانية بأن البارصا مهتمين به، فما كاين والو حتى لدابا، والأكثر من هذا الشي الموضوع بدا كايتنسى، وما معروفش واش بالفعل اللاعب داخل فالاهتمامات ديال الفريق الكتالوني ولا غير الإعلام الإسباني كايجتهد.

اما لاعبين مغاربة بحال انس صلاح الدين وسفيان أمرابط راه مازال ما عارفينش راسهم من رجليهم فهاد الميركاتو، ومع من غادي يلعبو الموسم الجاي، فمثلا انس صلاح الدين اللي تألق الموسم اللي فات مع ايندهوفن الهولندي رجع لروما الطالياني اللي كانو عاطينو بريطي يلعب معهم الفريق الهولندي، وواخا التألق ديالو ما قدرش يقنع ايندهوفن بالبقاء معهم او يجيب عرض للانتقال لفريق آخر من روما اللي خارج من الحسابات ديالهم، ونفس الشي بالنسبة لسفيان امرابط اللي حتى هو كايعيش وضع صعيب بعد نهاية إعارتو من فنربخشة التركي لريال بيتيس الاسباني، ولا الفريق الاسباني قرر يخليه عندو بشكل نهائي ولا فنربخشة باغيينو يرجع معهم ومازال ما جا فيه حتى عرض.

هذا الوضع اللي كايعيشوه اللاعبين المغاربة فكل ميركاتو، ما غاديش يأثر عليهم غير هما، ولكن راه عندو تأثير حتى على المنتخب الوطني الوطني المغربي، حيث مستواهم الفردي كايأثر على المستوى الجماعي د المنتخب، وهذا الشي اللي كان نبه له الناخب الوطني محمد وهبي بعد الإقصاء من ربع نهائي مونديال 2026، امام المنتخب الفرنسي، ملي طلب من اللاعبين المغاربة يطورو ريوسهم بالانتقال لاندية اكبر واقوى على المستوى الاوروبي ومنافسة على الالقاب باش مستواهم يطلع، ولكن هذا الشي مازال ما وقع مع اغلب اللاعبين فهاد الميركاتو باستثناء إسماعيل الصايباري اللي مشى من ايندهوفن الهولندي لبايرن ميونخ الالماني، وبالمقابل مازال اللاعبين المغاربة الاخرين فبلايصهم، وهنا كاتطرح اسئلة كثيرة “علاش اللاعبين المغاربة ما كايقدروش يفرضو ريوسهم فالانتقالت ويمشيو لاندية افضل واخا كيكونو متألقين؟ وواش كاين مشكل فاللاعبين المغاربة ووكلائهم؟ ولا مشكل فالاندية الأوروبية الكبيرة اللي مازال ما كاتيقش فاللاعب المغربي واخا المستويات اللي وصل لها؟”، مع العلم ان لاعبين بحال اشرف حكيمي فباريس سان جرمان الفرنسي وبراهيم دياز مع ريال مدريد الإسباني ونصير مزراوي مع مانشستر يونايتد النگليزي اكدو ان اللاعب المغربي قادر يعطي مستوى كبير إلى تعطاتو الثقة.